“Həyat Fondu”nun yaranmasının bir ili tamam olub.

Axşam.az-ın məlumatına görə, bu münasibətlə “Buta Palace”da təntənəli tədbir keçirilib. Mərasimdə ictimai-siyasi xadimlər, incəsənət nümayəndələri, idmançılar, şirkət rəhbərləri, fondun dəstəyi ilə müalicə alan ailələr iştirak ediblər.

“Yardım et, həyat ver” devizi ilə fəaliyyət göstərən Fondun əsas qonağı Heydər Əliyev Fondunun vitse-prezidenti Leyla Əliyeva olub. Tədbirdə əvvəlcə Azərbaycan dövlət himni səsləndirilib. Daha sonra isə fondun fəaliyyətini əks etdirən çarx nümayiş edilib.

Gecənin aparıcılığı Nərgiz Cəlilova, Nəsib Nur və Kəmalə Piriyeva həvalə edilib. Gecədə xalq artistləri Fidan və Xumaran Qasımovalar, Brilliant dadaşova, Zülfiyyə Xanbabayva, əməkdar artist Lalə Məmmədova mahnılar səsləndirib. İlk olaraq isə səhnəyə Fidan və Xuraman Qasımova bacıları çıxaraq sözləri Leyla Əliyevaya məxsus “Ürək yaddaşı” mahnısını oxuyublar.

Tədbirdə müxtəlif uşaq evlərinin sakinləri, fiziki qüsurlu yeniyetmələr və gənclərin hazırladığı əl işləri xeyriyyə məqsədi ilə satışa çıxarılıb.

Sonda isə “Həyat Fondu”nun təsisçisi Hacı Nuran Hüseynov ona dəstək olan hər kəsə təşəkkür bildirib.

Foto: Ramin ASLANOV