ATV kanalının ən baxımlı kanal olması danılmaz bir faktdır. Son iki ildə ATV kanalında baş verən köklü dəyişikliklər aşkar şəkildə hiss olunmaqdadır.

Tanınmış televiziya mütəxəssisi, alim Vüqar Qaradağlının ATV kanalına rəhbər təyin olunması ilə kanal başqa bir fərqli tərzdə öz veriliş və layihələri ilə tamaşaçıların görüşünə gəldi. Xəbərlərin dolğunluğu, əhatə dairəsinin genişliyi, ölkədə və dünyada baş verən hadisələrin analitik və qərəzsiz tamaşaçıya çatdırılması tamaşaçının xəbərə olan qıtlığını doldurmaqda əvəzsiz xidmətləri olan kanalın son iki ildəki uğurları təqdirəlayiqdir.

Onu da qeyd etmək istərdik ki, qeyri-peşəkarlar və peşəkarlıqdan uzaq insanların efirdə olmaması kanalın tutduğu obyektiv mövqedən xəbər verir. Azərbaycan ədəbi dilinin efirdə qorunması, bu sahədə kanalda aparılan işlər öz nəticəsini verir. Peşəkar teleaparıcılar Zaur Baxşəliyev, Orxan Fikrətoğlu, İradə İsaq, İlhamə Bədəlova, Mətanət Əliverdiyeva öz professionallıqları ilə tamaşaçı kütləsinin rəğbətini qazana biliblər. Xəbər aparıcısı kimi tanınan Mətanət Əliverdiyevanı başqa bir formatda tamaşaçıya təqdim etməklə kanal aparıcının digər qabiliyyətlərini üzə çıxardı. Teleməkanda sənət və şou-biznes nümayəndələrinə sözü düz üzünə deməkdə cəsarətli telejurnalist İradə İsaqın xidmətləri danılmazdır. Obyektiv kanalda düz sözə qiymətin verilməsi, mənfi və müsbət cəhətləri çəkinmədən düz üzə deməkdə gücün varlığı obyektivliyin təsdiqini sübut edir. Şou aparıcısı kimi tanınan Zaur Baxşəliyevin sosial yönümlü verilişin aparıcısı kimi özünü təsdiq etməsi kanalın aparıcıya olan etimadının nəticəsidir. Kanalda aparılan köklü islahatlar aparıcıların digər formatda və simada tamaşaçı auditoriyasına təqdim edilməsində öz bəhrələrini verir. Danılmaz bir faktdır ki, son iki ildə ATV rəhbərliyinin imza atdığı yeni layihələr və eksperimentlər digər telekanallar tərəfindən sanki zəbt edilərək forma və məzmunu saxlanılmaqla başqa bir adla efirə gedir. Ancaq mayasında ATV-nin layihəsi dayandığından çox təəssüflər ki, həmin layihələr elə yerindəcə yırğalanır. Sanki get-gedə ideya oğrularının sayı çoxalır. Parlaq layihələrin olması üçün düşünmək lazımdır. Nəinki hər hansısa bir telekanalın ideya məhsulu olan verilişləri təkrarlamaq... Son iki ildə dövlət və dövlətçiliyimizin təbliği, milli-mənəvi dəyərlərimizin aşılanması, nadir sənət incilərimizin tamaşaçılara çatdırılaraq apardıqları maarifləndirmə işi təqdirəlayiqdir.
 
Qeyd etmək yerinə düşərdi ki, kanalda problem olaraq qaldırılan məsələlər çox qısa zaman kəsiyində öz efir nəticəsini verir. İşinə məsuliyyətlə yanaşan məmurların qüsurları obyektiv şəkildə, çəkinmədən efirə verilir. Məhz bu addımlar xalqın kanala olan inamını və etibarını daha da artırır. Sanki insanlar problemləri ilə bağlı ATV kanalını ümid yeri bilib bura üz tuturlar. Məmurlar tərəfindən incidilən, haqqı tapdanan insanların, iş adamlarının, sadə kütlənin müraciətlərinə yerindəcə baxılır. Bəzi telekanallardan fərqli olaraq ATV kanalında sənəti olmayan, lentə aldıqları mahnılar “xaric” notlara söykənən müğənnilərin efirdə görünməməsi və bu sahədə aparılan mübarizə kanalın musiqi seçiminin dəyərindən xəbər verir. Bəzi kanallarda efirə gedən kliplərə baxanda insan utanır. Bu sadəcə olaraq maddiyyata söykəndiyindən çox gülünc görünür. ATV-də məhz bədii şuranın olması, onun verilişlərə və efirə nəzarəti neqativ hallarla mübarizədə öz sözünü deyir.

Vüqar Qaradağlının ATV kanalına rəhbər təyin olunması kanalın tərəqqi və inkişafına böyük töhfələr verdi. Kanal rəhbəri olaraq tələbkarlığı, peşəkarlığı, yüksək idarəetmə qabiliyyəti, mədəniyyəti, nizam-intizamı kanalda çalışan işçilərə də bir örnək olduğundan kanal daha böyük uğurlara imza atır. ATV kanalında sıçrayışlar daha qabarıq hiss olunur. Kanaldakı yaranan müsbət abu-hava olduqca qənaətbəxşdir. Ən baxımlı kanal olmaqla bərabər ATV ziyalıların seçimində və dəstəyində olan bir kanal səviyyəsinə ucaldı. Təbii ki, bu ATV kanalına rəhbər təyin olunan Vüqar Qaradağlının zəhmətinin nəticəsidir. İnanırıq ki, qarşıda ATV kanalı daha maraqlı layihələri ilə tamaşaçıların görüşünə gələcək və istedadlı gənclərin dünya arenasına çıxmalarında, Azərbaycan həqiqətlərinin dünyaya çatdırılmasında, mədəni irsimizin təbliğində öz xeyirxah missiyasını davam etdirəcək. Və heç zaman ATV kanalı haqqı nahaqqa qurban verməyəcək.

Vüqar Əhməd - filoloğiya elmləri doktoru, professor
Alim Nəbioğlu – jurnalist-publisist Vətəninfo.az