Bakı-2015 Avropa Oyunlarının məşəli Salyandan Neftçalaya ötürülüb.

Axşam.az-ın məlumatına görə, şəhər mərkəzində təşkil olunmuş yürüşü Azərbaycanın ərazi bütövlüyünün müdafiəsi zamanı fiziki sağlamlığını itirmiş mədəniyyət işçisi Ceyhun Mehdiyev başlayıb.

Bu mərasimdə Bakı-2015-in ulduz elçiləri, aktyorlar Rafael İsgəndərov və Coşqun Rəhimovun da iştirak edib.

Son məşəlçi, futbol məşqçisi Dilavər Yaqubov Bayraq meydanına gətirərək səhnəyə qalxıb. Burada yandırılmış və coğrafya fənni üzrə respublika olimpiadasının qızıl medalçısı İlham Səmədovun ictimaiyyətə təqdim etdiyi çıraq Oyunların sonuna qədər şəhərə hədiyyə edilib.

Neftçalada başa çatan estafet günü mayın 5-də Şirvan və Hacıqəbulla davam etdiriləcək.