Müğənni və teleaparıcı Vüsalə Rəcova geyim tərzindən danışıb.

Açıq-saçıq libasları sevmədiyini deyən ifaçı qarderob sirlərini Axşam.az-la bölüşüb:

“Qarderobumda həm bahalı brendlər, həm də sadə geyimlər var. Əsas mənə yaraşanı geyinirəm. Qazancımın 99 faizini geyimlərə xərcləyirəm. Alış-veriş zamanı həyat yoldaşımla (nişanlımla) məsləhətləşirəm. Amma mənə qadağa qoymaq həddinə çatdırmamışam. Geyimə mənim qədər o da həssasdır. Pulumuzu nəyə xərcləməli olduğumuzu bilirik. Ən əsası isə ailəmin başını aşağı edən, qınaq obyekti yaradan geyimləri heç vaxt qarderobuma gətirmərəm”.

Bəzi sənətçilərin cəsarətli sine dekolteləri, qısa ətəkləri ilə gündəmə gəlməyinə birmənalı yanaşmayan V.Rəcova buna başqa prizmadan yanaşıb:

“Məncə, sinəsi, yaxud ətəyi açıq geyim insanın cəsarətli olmağına işarə deyil. Səhnə geyimləri diqqət çəkməlidi, amma çılpaqlığına görə yox. Bəzi insanların açıq-saçıq geyinməməyinə geridəqalmış kimi baxırlar. Mən bütün bunların fonunda əndazədən çıxmağı cəsarət saymıram”.