"Afaq Bəşirqızından halallıq aldım" - "Keyxanım"

"Afaq Bəşirqızından halallıq aldım" -  "Keyxanım"
4033 dəfə oxunub
  • A-
  • A
  • A+
Azərbaycan Dövlət Musiqili Teatrında oktyabrın 17-də “Mən dəyərəm min cavana” (F. Sücəddinov, T. Vəliyeva) tamaşası nümayiş olunacaq.

Teatrın mətbuat xidmətinin rəhbəri Samir Sədaqətoğlu Axşam.az-a bildirib ki, xalq artisti Afaq Bəşirqızının oynadığı Güldəstə obrazını bu dəfə aktrisa Ülviyyə Əliyeva canlandıracaq. Çoxlarının televiziyadan “Keyxanım” kimi tanıdığı U.Əliyeva bundan böyük şərəf duyduğunu dilə gətirib:

"Artıq səkkizinci dəfədir ki, “Mən dəyərəm min cavana” tamaşasında Güldəstə obrazını oynayacağam. Mənə qədər bu obrazı Azərbaycanımızın böyük aktrisası, mənim ustadım Afaq xanım Bəşirqızı ifa edib. Teatrdan bu rol mənə təklif olunanda ilk növbədə Afaq xanımla əlaqə saxladım, ondan halallıq aldım. Cünki belə bir obrazı oynamaq üçqat məsuliyyətdi. Birincisi ona görə ki, artıq Afaq xanım bu obraza öz oyunuyla möhür vurub. İkincisi, Afaq xanım mənim ustadımdır. Üçüncüsü, xalq artisti İlham Namiq Kamalla tərəf-müqabil olmaq daha böyük məsuliyyətdir. İnanıram ki, mənə göstərilən etimadı doğruldacaq, Güldəstə obrazını öz ifamda tamaşaçılara sevdirə biləcək və bu obrazın sevilən ifaçısı ola biləcəyəm”.
 
Qeyd edək ki, tamaşanın quruluşçu-rejissoru Yusif Əkbərov, quruluşçu-drijoru əməkdar incəsənət xadimi Nazim Hacıəlibəyovdur. Rolları xalq artisti İlham Namiq Kamal, Əməkdar artistlər Nərgiz Kərimova, Əkbər Əlizadə, aktyorlar Rəsmiyyə Nurəhmədova, Gülçöhrə Abdullayeva, Nadir Xasıyev, Gülnarə Abdullayeva, Elxan İsmayılov, Elnarə Nağdəliyeva, Əlif Cahangirov və Rəşad Məmmədov ifa edirlər.