Haqqında filmlər, mahnılar və bir çox əsrarəngiz əfsanələr dolaşan "Titanik" gəmisi ilə bağlı yeni şəkillər də yayılıb.

Axşam.az xəbər verir ki, şəkillər müxtəlif təbəqədən olan qonaqlar üçün otaqlar, yeməkxana və kafelər, istirahət məkanları, idman və əyləncə yerlərinə aiddir. Fotoların bu zamana qədər necə və hansı şəraitdə qorunub saxlandığı bilinmir.

“Titanik” gəmisi İngiltərənin Sauthempton limanından ABŞ-ın Nyu-York şəhərinə doğru ilk səyahəti zamanı 14 aprel 1912-ci ildə Atlantik okeanında aysberqlə toqquşaraq 2 saat 40 dəqiqə sonra batıb. Göyərtəsindəki 1 316 sərnişin və 908 heyət üzvündən yalnız 705 nəfər xilas ola bilib, 1 514 nəfər isə həlak olub.

Qeyd edək ki, gəminin hazırlandığı dövrdə lüks gəmilər sırasında ilk yeri "Titanik" tuturdu. Gəmidə digər lüks gəmilərdə olduğu kimi hovuz, idman salonu, türk hamam, həm birinci həm də ikinci sinif sərnişinlər üçün kitabxana, tennis kortu vardı. Birinci sinifə məxsus otaqlarda xüsusi mebellər, bahalı divanlar və digər dekorativ əşyalar yerləşdirilmişdi. "Titanik"də bərbərxana və mərkəzi telefon stanstiyası belə fəaliyyət göstərirdi.