Azərbaycan Tibb Universiteti epidemiologiya kafedrasının müdiri, professor İbadulla Ağayevin səsyazısı ilə bağlı açıqlama yayıb.

Axşam.az xəbər verir ki, məsələ ilə bağlı ATU-nun mətbuat xidmətinin rəhbəri Günel Aslanova bildirib ki, karantin rejimi ilə əlaqədar universitetdə tədris prosesi dayandırıldığına görə yaşı 65-dən yuxarı olan professor İbadulla Ağayev  hazırda işə çıxmır:

“O, bu gün 2 nəfər qohumu ilə birgə Bakıdan kənarda, ailə üzvünün dəfnində iştirak edib. Jurnalist zəng edərkən İ.Ağayev məhz dəfn mərasimində olub. Bu durumda bir qədər emosional danışaraq jurnalistə yalnız axşam cavab verə biləcəyini bildirib.

İ.Ağayev tutduğu vəzifəyə əsasən, ictimai əsaslarla Azərbaycan Respublikası Səhiyyə Nazirliyinin Baş epidemioloqu kimi fəaliyyət göstərir.

Digər tərəfdən, xatırlatmaq istəyirəm ki, Azərbaycan Respublikasının qanunvericiliyinə əsasən, respondentin xəbəri olmadan onun səsini yazıb paylaşmaq qanun pozuntusudur.

Qeyd edək ki, ATU rəhbərliyi məsələ ilə bağlı ətraflı araşdırma aparacaq”.