"WhatsApp+" işlədirsinizsə, silin - Xəbərdarlıq

"WhatsApp+" işlədirsinizsə, silin - Xəbərdarlıq
33602 dəfə oxunub
  • A-
  • A
  • A+

“WhatsApp+” istifadəçilərinə məxsus profillərin ələ keçirildiyi iddia olunur. 

Axşam.az xəbər verir ki, bu barədə sosial şəbəkələrdə məlumatlar yayılıb. Bəzi vətəndaşlar həmçinin bu gün səhər saatlarından etibarən mağazalarda bank kartları ilə ödəniş edə bilmədiklərini bildiriblər. 

Texnobloger Fərid Pərdəşünas da feysbuk hesabında analoji problemin yaşanması, “WhatsApp+” profillərinə kütləvi hücumun olması ilə bağlı paylaşım edib. O, sözügedən tətbiqin istifadəçilərinin ələ keçirilən profillər üzərindən bank hesablarına girildiyi və hesablardakı məbləğlərin çıxarıldığını vurğulayıb:

“Hazırda saxta “WhatsApp+” istifadə edənlərin bank hesablarından pullar oğurlanır. Pulu oğurlananlar and-aman edib, bankları günahlandırsa da əslində “WhatsApp+”da olan arxa qapı sayəsində bank tətbiqlərinə giriş əldə edilir.

Azərbaycan saxta “WhatsApp+” yüklənmə sayına görə dünyada 1-ci yerdədir. “WhatsApp+” orijinal “WhatsApp”da olmayan imkanları təqdim edən saxta həlldir".

Məsələ ilə bağlı Elektron Təhlükəsizlik Xidməti açıqlama yayıb:

“Elektron Təhlükəsizlik Xidməti vətəndaşları tətbiqləri yükləyərkən diqqətli olmağa çağırır. Xidmət tərəfindən aparılan araşdırmalar nəticəsində vətəndaşların üzləşdiyi maliyyə itkisinin və cihazlarının zərərverici proqramlarla yoluxmasının əsas səbəbinin “WhatsApp+” və bunun kimi rəsmi müəllifi tərəfindən yayımlanmayan və etibarlı mənbələrdən yüklənilməyən tətbiqlər nəticəsində baş verdiyi müəyyən olunub.

Həmçinin müşahidələr göstərir ki, kiberdələduzlar belə tətbiqlər vasitəsilə vətəndaşların fərdi məlumatlarını oğurlamaq və cihazlarından növbəti kiberhücumları həyata keçirmək üçün istifadə edir. Elektron Təhlükəsizlik Xidməti vətəndaşlara bu kimi hallara diqqətlə yanaşmağı, tətbiqləri yalnız rəsmi mənbələrdən yükləməyi, tətbiqləri yükləyərkən verilən icazələri nəzərdən keçirməyi tövsiyə edir”.