Mövsüm dəyişikliyi zamanı dəridə bir sıra xoşagəlməz hallar baş verir. Ona görə də payızda üz dərisinə qulluq xüsusilə vacibdir, çünki həmin dövrdə dəri daha həssas, zəifləmiş və allergiyaya meyilli olur.

Axşam.az xəbər verir ki, dəri gündə iki dəfə - səhər və axşam yuyub təmizləmək lazımdır.

Üz dərisinin sağlamlığı üçün vacib olan məsələlərdən biri də sudur. Yaz və yayada içilən bol su dərini qurumağa qoymur. Bunu payızda da davam etdirməyi unutmayın. Yuxu rejimi də dəri üçün çox əhəmiyyətlidir, çünki yuxusuzluq dəriyə solğunluq və şişkinlik verir. Mövsümə uyğun meyvə-tərəvəz yeyilməsi də orqanizmi təmizləyir.

Kosmetoloqların dediyinə görə, günəş vannası qəbul ediləndə onun mənfi təsirləri nəzərə alınmalı, dəri yandırıcı şüalar və zərərli təsirlərdən qorunmalıdır.Bu səbəbdən payız fəslində edilən makiyajın bir sıra qaydalarına riayət etmək mütləqdir.

Bildirilib ki, soyuq aylarda dəri ilə əlaqədar şikayətlərin əksəriyyətini günəşdən yanma halları təşkil edir. Belə ki, yayda günəş vannası qəbul edənlərin dərisi həssaslaşır. Əgər dəridə yanıq hiss olunarsa, dərhal qabaqlayıcı tədbirlər görülməlidir. Bunun üçün, ilk növbədə, əl-üzü yumaq, soyuducudan buz götürüb üz dərisini soyutmaq tələb olunur. 

Üzə bitki yağları, xüsusilə gicitkən, itburnu və zeytun yağı da yaxşı təsir göstərir. Dəridə yaranan çillər, ləkələr də günəşin ultrabənövşəyi şüalarının təsirindən əmələ gəlir. 

Faydalı maskaların ev şəraitində hazırlanması da mümkündür. Belə ki, iki qaşıq kəpək və bir qaşıq bal və ya bir qaşıq qaymaq qarışdırmaqla da sadə maska hazırlamaq olar.

Onu da qeyd etmək lazımdır ki, ümumiyyətlə mütəxəssislər makiyajdan daha az istifadə edilməsini məsləhət görürlər. Xüsusilə ağır tonlaşdırıcı kremlərin daha yüngülləri ilə əvəz olunması məqsədəuyğun hesab edilir.