Meyvələrdən hazırlanan şərbətlər orqanizmi lazım olan vitaminlərlə təmin etdiyi kimi, həm də müalicəvi xarakter daşıyır.

Axşam.az xarici mətbuata istinadən şərbətlərin faydalarını təqdim edir:

Alma şərbəti:

Mədə və ürəyi qüvvətləndirir, susuzluq, ürəkdöyüntüsü və ürəkbulanmanın qarşısını alır. Meyxoş dağ almasını əzib, suyunu çıxarıb, od üzərində azca bişirib, süzüb, bir gecə saxlayın. Onu qatılaşdırmaq üçün ertəsi gün bir daha yüngül odda bir az bişirib, şəkər qatın.

Bal şərbəti

Soyuqdəymədən olan xəstəliklər, sinə və qaraciyər ağrıları üçün çox münasibdir. Bir hissə bala iki hissə bərabərində su qatılır. Vam odda bişirilir və kəfi yığılır. Şərbətin təsirini artırmaq üçün üçdə bir hissəyə azca döyülmüş darçın, zəncəfil və quluncan əlavə edilir.

Əncir şərbəti 

Böyrəyi isti saxlayır, soyuqdəymədən olan bel ağrısı üçün faydalıdır. Əncirin üzərini örtənə qədər su töküb bişirin. Bir neçə gün saxladıqdan sonra süzüb, yarısı qədər bal qatıb, işlədin. Bunu quru əncirdən də hazırlamaq olar.

Turş nar şərbəti

Ödün şiddətini yatırır, mədəni möhkəmlədir, ishala qarşı yaxşı təsir edir. Narın suyu vam odda bişirilir, 1/3 qədər qənd və ya bal əlavə edilir. Eyni halda hazırlanan şirin nar şərbətisə sətəlcəm və sinə ağrısına qarşı, qara tut şərbəti boğaz ağrısı və iştahasızlıq hallarına, ağ tut şərbəti tənəffüs orqanı xəstəlikləri, həzm və mədə zəifliyinə qarşı, quzuqulağı və ya turşəng şərbəti isə qaraciyər, bağırsaq və öd şiddətinə qarşı məsləhətdir.

Zirinc şərbəti

Ürəkdöyüntüsü, ürəkbulanma və iştahasızlıq hallarında faydalıdır. Onun suyunu sıxıb çıxarır və eyni miqdarda alma suyu, yarısı qədər limon suyu qatıb, şirinliyi üçün şəkər əlavə edib qarışdırılır.

Gavalı şərbəti

Baş ağrısını və öd şiddətini yüngülləşdirir. Sarılıq zamanı yaxşı təsirə malikdir. Suda tam qaynadıb süzün, dadına görə azja şəkər qatın.

Qora şərbəti

Mədə, mədə zəifliyi istiliklə müşayiət olunan ağrılar zamanı, susuzluq və hamiləlik zamanı işlədilir. Qora suyunu yarıya çatana qədər qaynadıb, bir gecə saxlayıb, yenidən ona əvvəlki miqdarı qədər qərənfil qatıb qaynadırlar ki, qoxusunu aparsın. Sonra şəkər əlavə edib qaynadırlar. Qora suyu təmiz halda qədim vaxtlardan şəkər xəstəliyinin müalicəsində işlədilir.

Gül şərbəti

Qaraciyər üçün faydalıdır. Gül suda 1/4 hissəsi qalanadək qaynadılır. Sonra onu süzüb, qatılaşdırmaq üçün özü miqdarında şəkər əlavə edirlər.

Gülab şərbəti

Mədə iltihabı və öskürək üçün faydalıdır. Sidik və tərqovucudur. Tənəffüs orqanlarını möhkəmləndirir. Gülaba 1/3 hissəsi qədər şəkər qatılıb, vam odda bişirilir, kəfi yığılır, 2-3 qr. döyülmüş zəfəran qarışdırılır və istifadə olunur.

Heyva və limon şərbəti

Həzmi gücləndirir, susuzluğu yatırdır, ishal, ürəkbulanma, mədə və qarajiyər üçün faydalıdır. Şirin heyva suyuna yarısı qədər limon suyu qatıb, eyni miqdarda şəkər əlavə edib, vam odda qaynadırlar.

Bənövşə şərbəti

Qızdırma, öskürək, qan təzyiqi zamanı faydalıdır. Təzə bənövşəyə onun 1/3 hissəsi qədər su qatıb qaynadırlar. 1/4 hissəsi qalarkən, bənövşə miqdarında şəkər qatıb, qatılaşdırırlar. Bənövşə quru olarsa, 1 hissə bənövşə iki dəfə özü qədər şəkərlə bişirilir.

Nanə şərbəti

Mədəni qüvvətləndirir, ürəkbulanma, ishal və hıçqırmaya qarşı faydalıdır.