Moskvada "Unitree G1" model humanoid robotlar arasında qeyri-adi toy mərasimi keçirilib.

Axşam.az xəbər verir ki, “Robert” adlı bloger robot və “Matilda” adlı balerina robot ilk dəfə Peterburq Beynəlxalq İqtisadi Forumunda təqdim edildikdən sonra evləniblər. Mərasim Puşkin adına kitabxanada baş tutub. 

Robot “gəlin-bəy” and içərək bir-birlərinə bağlı qalacaqlarını bildiriblər. "Robert" həyatın bütün alqoritmlərində etibarlı tərəfdaş olacağına söz verib, "Matilda" isə həyat yoldaşını yeni kəşflərə ruhlandıracağını deyib. Toy üzükləri əvəzinə isə onlara “Dogmatik” adlı robot itləri qolbaq gətirib.

Hadisə isə Rusiyada bəzi siyasətçilərin tənqidinə səbəb olub. Dövlət Dumasının informasiya siyasəti üzrə sədr müavini Andrey Svintsov bunu qəbuledilməz adlandırıb 

O bildirib ki, robotlar heç vaxt tam mənada ailə hesab oluna bilməz. Deputatın sözlərinə görə, ənənəvi ailə anlayışı yalnız kişi və qadın birliyi üzərində qurulmalıdır.

Robotların toy mərasimi sosial şəbəkələrdə də geniş müzakirələrə səbəb olub. Bəziləri bunu texnologiyanın inkişafının maraqlı nümunəsi kimi qiymətləndirərkən, digərləri belə tədbirləri ənənəvi dəyərlərə zidd hesab edib.