Sentyabrın 18-də Səbail Rayon İcra Hakimiyyətinin təşkilatçılığı ilə Üzeyir Hacıbəyovun 134 illiyi - Üzeyir Musiqi Günü ilə əlaqədar konsert keçirilib.

Axşam.az APA-ya istinadən xəbər verir ki, konsertdə Azərbaycan Dövlət Akademik Musiqili Teatrının böyük kollektivi çıxış edib.

Orkestri Baş dirijor- Əməkdar İncəsənət Xadimi Fəxrəddin Atayev müşayiət edib. Konsertin rejissoru və ssenari müəllifi Elməddin Dadaşov bildirib ki, konsertdə ümumilikdə Azərbaycan Dövlət Akademik Musiqili Teatrının repertuarında olan əsərlərin müəyyən qismi şəhərin qonaqlarına və sakinlərə təqdim olunur:

"Ümumilikdə Üzeyir bəyin əsərlərinə geniş yer verilib. Bundan başqa, Fikrət Əmirovun, Qara Qarayevin və xarici bəstəkarların əsərləri səslənəcək. Konsertdə Azərbaycan Dövlət Akademik Musiqili Teatrının solistləri, əməkdar və xalq artistləri iştirak edirlər".