Cövdət Hacıyev və Tofiq Quliyevin 100 illik yubileylərinə həsr olunmuş konsertlər keçiriləcək.

Bu barədə Axşam.az-a Azərbaycan Bəstəkarlar İttifaqından məlumat verilib.

Bu il Azərbaycan musiqi incəsənətinin iki görkəmli nümayəndəsinin - tanınmış bəstəkar, musiqi-ictimai xadim və pedaqoq, respublikanın xalq artisti, SSRİ və Azərbaycan Dövlət mükafatları laureatı, iri simfonik əsərlərin yaradıcısı Cövdət Hacıyevin və gözəl bəstəkar, musiqi-ictimai xadim, Azərbaycanın xalq artisti, Dövlət mükafatı laureatı, unudulmaz mahnıların və kino musiqisinin müəllifi Tofiq Quliyevin anadan olmasının 100 ili tamam olur.

Azərbaycan Bəstəkarlar İttifaqının Ü.Hacıbəyli adına Konsert Zalında bu görkəmli bəstəkarların 100 illik yubileylərinə həsr olunmuş kamera-instrumental və vokal əsərlərdən ibarət konsertlər keçiriləcək. Onların yaradıcılığının və musiqi-ictimai fəaliyyətinin müasir nöqteyi-nəzərdən araşdırılması məqsədilə keçiriləcək simpozium və konfranslarda iştirak etmək üçün respublikanın aparıcı musiqişünaslarından ibarət böyük nümayəndə heyəti cəlb olunacaq.

Bununla yanaşı, dahi bəstəkar və pedaqoq Qara Qarayevin 2018-ci ildə qeyd olunacaq 100 illik yubileyi ərəfəsində Bəstəkarlar İttifaqı konsertlər və elmi konfranslar keçirməyi nəzərdə tutur.

Məlum olduğu kimi, artıq son illərdə Bəstəkarlar İttifaqının Ü.Hacıbəyli adına Konsert Zalında müntəzəm olaraq “Azərbaycan bəstəkarlarının əsərləri gənc ifaçıların təqdimatında” layihəsi üzrə silsilə konsertlər keçirilir. Bu il ərzində keçiriləcək həmin silsilə konsertlərin proqramları yubilyar-bəstəkarların yaradıcılığına əsaslanacaq. Artıq hazır olan musiqişünaslıq işləri musiqi ictimaiyyətinə təqdim olunacaq, həmçinin Q.Qarayevin yaradıcılığına həsr olunmuş yeni musiqi-nəzəri işlərin yaradılması təşəbbüsü irəli sürüləcək.