Bu gün xalq artisti Aygün Kazımovanın ad günüdür.

Axşam.az-ın məlumatına görə, Aygün Kazımova 1971-ci ildə Bakıda anadan olub.
O, 1977-ci ildə 12 saylı məktəbin 1-ci sinfinə qədəm qoyub. 1989-cu ildə ailəsindən xəbərsiz İlqar adlı sevdiyi oğlana qoşulub qaçıb. Onun bu evliliyindən İlqarə adlı bir qızı dünyaya gəlib.

Aygün Kazımova peşəkar səhnəyə ilk dəfə 1988-ci ildə "Bakı Payızı" yarışması ilə qədəm qoyub. İlk "Qrand-pri" mükafatını məhz bu yarışmada qazanıb. 1989-cu ildə Yurmalada keçirilən beynəlxalq konkursda, 1992-ci ildə "Asiya Dausı" festivalında, 1996-cı ildə İstanbulda beynəlxalq yarışmada laureat olub.
 
2000-ci ildə "İlin müğənnisi", "İlin konserti: Aygün-Bir Gün", "İlin hiti: Gecələr" adlı üç nominasiya üzrə "Qrand" mükafatına layiq görülüb. 2001-ci ildə yenidən üç - "İlin müğənnisi", "İlin hit mahnısı: Я и ты", "İlin konserti: Я девушка восточнaя" nominasiyaları üzrə "Qrand" mükafatı qazanıb. İndiyə kimi saysız solo konserti olub. Bunlardan 1999-cu ildə "Aygün-Bir Gün", 2000-ci ildə "Я девушка восточная", 2001-ci ildə "Qeyri-adi şou", 2006-cı ildə Moskvada möhtəşəm yubiley konsertlərini misal göstərmək olar.

Bu günə kimi onlarca diski çıxıb. 2001-ci ildə Azərbaycanın əməkdar artisti, 2009-cu ildə isə xalq artisti adlarına layiq görülüb. Vaqif Gərayzadə, Eldar Mansurov və Cavanşir Quliyev kimi bəstəkarlarla birgə çalışıb. Xarici ölkələrdə də konsertlər verib. Onlardan ən məşhuru 2006-cı ildə Moskvada Dövlət Kreml sarayında təşkil edilən gecə olub.

2005-ci ildə rejissor Arif Qazıyevin "Xarı bülbüllər" musiqili filmində baş rola çəkilib. Həmçinin "Best Model of Azerbaijan"ın rəhbəri vəzifəsində də iştirak edib.

2012-ci ildə Türkiyənin ən tanınmış müğənni və bəstəkarları olan Sinan Akçıl və Sərdar Ortacla iş birliyi qurub. Sinan Akçıl ilə "İkinci sen" adlı duet ifa edib. Sərdar Ortacdan isə "Hayat ona güzel" adlı mahnı ifa edib. Hər iki mahnı müğənninin karyerasına uğur gətirib. Məhz 2012-ci ildə ifa etdiyi bu mahnılara görə Mədəniyyət və Turizm Nazirliyinin təsis etdiyi "Qrand 2012" mükafatına layiq görülüb. Sinan Akçıl ilə ifa etdiyi duet müğənniyə "İlin dueti", Sərdar Ortacdan ifa etdiyi mahnının klipinə görə isə "İlin klipi" mükafatına layiq görülüb.

2012-ci ilin sonundan dünya layihəsinə start verib. Müğənninin Türkiyədə çalışdığı "DokuzSekiz" musiqi şirkətinin köməkliyi ilə Hollivud ulduzu, reper Snup Doq ilə duet ifa edib. Həmin mahnının adı "Coffee from Columbia" olub. Müğənni adı çəkilən mahnı ilə eyni adda CD də çıxarıb. Albomda 12 mahnı yer alıb. Eyni zamanda Snup Doq ilə ifa olunan duetə dünyanın, xüsusilə Amerika Birləşmiş Ştatlarının və Türkiyənin ən məşhur DJ-ləri remiks versiya hazırlayıb.  "Coffee from Columbia" mahnısı və mahnıya çəkilən klip Türkiyə və Azərbaycan telekanalları ilə yanaşı, dünyanın əsas musiqi kanalları, o cümlədən MTV-də də nümayiş olunub.

Uzun müddət Türkiyədə fəaliyyət göstərən prodüser şirkəti "Dokuz Sekiz Muzik" ilə əməkdaşlıq edən Aygün Kazımova, 16 sentyabr 106.3 FM-də Türkiyənin ən məşhur müğənnilərindən olan Sinan Akçıl ilə qonaq olarkən artıq adıçəkilən şirkət ilə əməkdaşlığa son qoyduğunu açıqlayıb. Müğənni artıq Türkiyənin ən nüfuzlu prodüser şirkəti hesab olunan "DMC Production" ilə müqavilə imzaladığı bildirib. Həmin şirkətlə Türkiyənin meqa ulduzları, Tarkan, Sezen Aksu, Ajda Pekkan, Kenan Doğulu və digərləri əməkdaşlıq edir.

Axşam.az saytının kollektivi Aygün Kazımovanı ad günü münasibətilə təbrik edir, ona gələcək işlərində uğurlar arzulayır.