Quba şəhərində yeni abadlaşdırılan küçələrə Vətən müharibəsində şəhid olan 14 qəhrəman döyüşçümüzün adı verilib.

Axşam.az "AzərTac"a istinadən xəbər verir ki, yenidən qurulan küçələrdən birinə Azərbaycanın Milli Qəhrəmanı Polad Həşimovun, digərlərinə isə qubalı şəhidlərin adı verilib. Artıq küçələrə adların yazıldığı lövhələr vurulub.

Abadlıq işləri aparılan yaşayış massivində 22 küçə mövcuddur. Küçələrin ümumi uzunluğu isə 16 kilometrdən çoxdur. Bu məhəllələrdə qırx ilə yaxındır ki, əhalinin məskunlaşmasına başlanılıb. Minə yaxın yaşayış evi olan massivin əhalisi uzun illərdir yollarının narahatlığı səbəbindən problemlərlə qarşılaşırdılar.

Ərazidəki bütün küçələrin asfaltlanması artıq başa çatdırılıb. Bununla yanaşı, küçələrdə səkilər abadlaşdırılıb, müvafiq yerlərdə küçələrin genişləndirilməsi təmin olunub.

Sakinlər yaşadıqları küçələrə şəhidlərimizin adının verilməsinə görə qürur duyduqlarını bildiriblər.