Xəbər verdiyimiz kimi, aparıcılığını Vüsalə Əlizadənin etdiyi "İncə səhər" verilişi bu gün yayımını yarımçıq dayandırıb.

Axşam.az-ın məlumatına görə, telekanal məsələ ilə bağlı açıqlama yayaraq proqram zamanı texniki nasazlığın yarandığını bildirib:

"Bu gün saat 10:38-də Xəzər TV-də “İncə Səhər” verilişinin yayımı zamanı texniki problem yaranıb. Bildiririk ki, sözügedən verilişin bu həftə efirə getmiş bütün buraxılışları öncədən çəkilib. Verilişin bugünkü buraxılışı da əvvəlki günlərdə çəkilib, anonsu uğurla yayımlanıb və həmin mərhələdə heç bir nasazlıq qeydə alınmayıb.

Bu gün yayımlanacaq buraxılış 2 fayldan ibarət idi. 1-ci fayl heç bir problem olmadan efirə verilib.

Reklam buraxılışına ayrılıb və 2-ci faylın yayımlanması zamanı texniki problem yaranıb. Fayl "playout" sistemi tərəfindən oxunmadığı üçün efirə çıxmayıb. Tətbiqi proqram təminatında kritik xəta baş verib, bu isə əsas efir serverində cihaz səviyyəli nasazlıq yaradıb, nəticədə də verilişin tam yayımı mümkün olmayıb.

“Xəzər TV” olaraq yaranmış narahatlığı anlayışla qarşıladıqları və efirimizi diqqətlə izlədikləri üçün izləyicilərimizə minnətdarlığımızı bildiririk".

Qeyd edək ki, verilişdə müğənnilər Almaxanım Əhmədova, Pərviz Abdullayev və Namiq Qasımov qonaq olub.