Füzuli rayonunun işğal günü Şəmkirdə toy məclisində çıxış etdikləri bildirilən müğənnilər danışıb.

Axşam.az publika.az-a istinadən xəbər verir ki, xəbəri elə gecəykən saytdan oxuduqlarını deyən Xəzər Televiziyasının “Hər şey daxil” proqramının aparıcıları, əkiz müğənni bacılar Sevil və Sevinc məlumatı oxuyanda çaş-baş qalıblar. Şəmkirdə toyda olduqlarını deyən bacılar gah nala vurdular, gah da mıxa:

“Hə, Şəmkirdə toyda olmuşuq…”

“Həmin gün Füzulinin işğal günü olduğunu, yəqin, unutmuşdunuz” sualından sonra isə toyda gah saat dörddən sonra oxuduqlarını, gah da toyun avqustun 24-də baş tutduğunu bildiriblər.

Elə Rəqsanənin prodüseri də məsələdən yayınmağa çalışdı. O, bizdən əvvəlcə dəlil-sübut istədi. Dəlil-sübutun olduğunu bildirəndə isə başqa çıxış yolu qalmadı:

“Əgər biz açıqlama verməli olsaq, birinci sizə verəcəyik”.

Elton Hüseyəliyevin telefonunu elə üzümüzəcə qapadılar. Xalq artisti Aygün Kazımovanın isə sorağı, həmişə olduğu kimi, Türkiyədən gəldi.

Xatırladaq ki, Füzuli rayonunun işğal günündə bir qrup müğənni toy mərasimində iştirak edib.
Mərasimə əvətlilərdən birinin verdiyi məlumata görə, həmin gün Şəmkir rayonunda baş tutan toy mərasimində xalq artisti Aygün Kazımova, Elton Hüseynəliyev, Rəqsanə, Xəzər Televiziyasının “Hər şey daxil” verilişinin aparıcıları - əkiz bacılar Sevil və Sevinc müğənni qismində iştirak ediblər.

Müğənnilər toydan şəkilləri “Instagram” sosial şəbəkəsində yerləşdirsələr də, sonradan onları siliblər.